عنهم .... زملائي و اصدقائي الاعزاء

اصعب شيء ان يتورط الانسان في تقييم الاخرين بهذا الشكل العلني و المتهور الذي سأفعله حالا ، و رغم ذلك فأني سأفعل لسبب بسيط هو انني لم انشيء هذه المدونة الا لاكون متهورا و اعبر عن تهوري و جنوني و حماقتي المتناهية .
شيء اخر هو ان اصدقائي في الدستور يستحقون تحمل حماقاتي و ايضا تقييمي فهؤلاء هم الذين اراهم اكثر مما اري اسرتي .
بداية فليعذرني كل انسان في الدستور في تقييمي له فهو موقفي الذي بنيته علي تصرفات و علي مشاهدات و علي مراقبة من بعيد لبعيد
و يبدو التقييم في كثير من الاحيان مجرد رؤية قد تصح و قد تخطيء و قد تختلف مع الزمن .
يلا بينا ناخد جولة في الدستور و ناسها و نبدأ بأوضة استاذ خالد السرجاني و بعدين نروح علي 127 الصالة التانية يعني .
نبدأ بصديقي العزيز مصطفي بسيوني اللي عمري ما قيمته قبل كده و لازم اخليه يندم انه عرفني .
مصطفي بسيوني : ببساطة هو المخلص مصطفي كل كلمة بيقولها مؤمن بيها لدرجة تفوق التصور ، عنده قدرة هايلة علي التحليل و قراءة الاخرين جدع بشكل لا تتخيله ، لكن و في لكن دي يسكن الشيطان مصطفي في كثير من الاوقات بيتوتر و يفقد اعصابه و ساعتها بتكون حساباته و تصرفاته عصبية اكتر من اللازم ، يلا نعمل ايه حظنا كده . صباح الفل يا درش .
نروح لمين تاني ؟ امممممم

احمد القاعود : احمد انسان جدع جي من الريف بكل النقاء اللي لسة شايلة ، طيب جدا و شاطر و نشيط و بيفهم لكن عنده مشكلة بحسها فيه انه عنده تصورات مسبقة عن حاجات كتير ميعرفهاش كويس و مع ذلك مش بيفكر يراجع موقفه منها .

محمد الخولي الجميل : محمد ده بقي حالة استثنائية لانه بجد حساس و بيفهم كويس و عنده رغبة مستمرة في انه يتعلم وصحفي جميل بيكتب كويس جدا ، و ابتسامته الدايمة تدل علي انه مهذب و خلوق ، محمد مشكلته الوحيدة في رأيي انه جه القاهرة و سلم شوية لحياة الناس مفرضش حياته عليهم .

طارق عبد العزيز: طارق عمري ما شفت منه غير انه انسان مهذب و بيتعامل مع كل الناس بروح ودودة و جميلة و خجول جدا ده لغاية دلوقتي ممكن بعدين اغير وجهة نظري عنه ههههههههه .

عبد الرحمن عبادي : عبد الرحمن انسان طيب و مهذب و شاطر و عنده طموح بس هو مشكلته ان اداءه فيه روح الموظف اكتر من روح الصحفي و دي مشكلة حلها بسيط انه يعتزل الصحافة و يشتغل موظف هههههههههه لا طبعا حلها انه يركز في دور الصحفي .

ندخل علي البنات اوكي ندخل مندخلش ليه احنا صغيرين ،
نبدأ بميييييييييين ؟
نبدا برنا ممدوح : رنا دي زي النسمة طيبة ، و بسطية و اداءها مش متكلف و صحفية شاطرة و مجتهدة و عندها قبول رباني ، بس مشكلتها اني بحس ان وجودها في المكان علشان الشغل بس مش مهم تعرف الناس و تاخد خبرات جديدة، لكن عموما بدأت اغير رأيي قريب ، طبعا عاوزين تعرفوا ليه انا غيرت رأيي ، بصراحة مش ح اقول لكم و اللي مش عاجبه يخرج من المدونة .
طيب شيماء عبد اللطيف : طبية و جدعة و بنت بلد و بجد مريحة جدا في تعاملاتها الانسانية لكن اصعب شيء في شيماء انك تحس انها دايما مرتبكة و بتدور علي حاجة ايه هي مش عارف و اظن انها هي كمان ما تعرفش .

شيماء ابو الخير : شيماء جدعة و تعاملهت متحضر معاصدقائها و انسانة تقدر بجد تتحاور معاها و تناقشها و تفهمك و تفهم منك و كمان صحفية مجتهدة و عندها طموح بس مشكلة شيماء انها كتير من الناس بتاخد فكرة مسبقة عنها انها مغرورة و بتتعامل بتعالي اصل الفكرة دي ايه و جت منين الله اعلم .

نروح 127 اوكي نروح ما نروحش ليه
طبعا ح نبدا بعمنا العظيم و صديقي العزيز ادم الجميل ، ادم انسان بجد هو ده ملخص الموضوع جدع و شهم و ابن بلد و صحفي مدهش و انساني في تصرفاته لابعد الحدود لكن مشكلة ادم ان حياته كلها محتاجة ترتيب و تنظيمعلشان يكون افضل في مواعيده و شغله و ارتباطاته .

نروح علي سيد تركي : سيد انسان مهذب جدا و جدع جدا و شفاف جدا و صحفي جدا برضو ، لكن مشكلة سيد الاساسية جاية من اجمل ما فيه لانه شفاف بجد فهو سريع الاحباط و الاكتئاب و المشكلة ان احباطه و اكتئابه بيطول جدا و مش بينتهي بسرعة .

هاني الاعصر : هاني انسان طيب واجمل ما فيه طموحه هو عاوز يكون حاجة كويسة و دي ميزة مش موجوده في اغلب الناس اللي بتضيها و خلاص ، كمان هو انسان و حساس لكن هاني محتاج يرسي و يهدا شوية انا حاسس انه مرة حيتسبب في رار اعتقال لينا كلنا نروح نقضي 6 سنين في وادي النطرون هههههههههههه

بيسان : بوسي هو ده اجمل وصف للبنت بيسان ، بيسان نفس شقاوة الاطفال و براءتهم نفس دهشتهم الدايمة و سرعة انفعالهم بوسي طفلة شقية و بريئة جدا و صحفية شاطرة و بتفهم كويس جدا - طبعا مش اهلها ناصريين هههههههههه - لكن مشكلة بيسان ان ردود افعالها دايما مش محسوبة يعني ممكن تنط من الشباك مثلا علشان ملقتش نسخة الجورنال بتاعها موجودة .

رحاب الشاذلي : رحاب دي نموذج للبنت اللي الغربة علمتها حاجات حلوة ، يعني شهامة و مشاركة و طبعا هي صحفية شاطرة و مجتهدة جدا لكن مشكلة رحاب انها ممكن تعمل تتخانق و تنفعل بسرعة لاسباب مش كبيرة يعني .

هدي ابو بكر : صديقة زكريا بيه ، هدي نموذج للطيبة و الوقار ، مجتهدة جدا و مهتمة بالشغل جدا و رقيقة جدا في تعاملها مع الناس و مركزة كويس مع القضاة ههههههههه مشكلة هدي اني بحس في كتير من الاحيان ان فيه حاجة نقصاها بتدور عليها و مش لاقياها ايه هي مش عارف بالظبط لكن ممكن ندور مع بعض يا هدد .

و بعد هذه هي رؤيتي فيكم و بس و اللي مش عاجبه له مطلق الحرية انه يخاصمني و اوعدكم ساعتها ح اكون سعيد جدا و ح يبقي الموضوع جاب النتيجة المطلوبة .